ဖိလစ်ပိုင် ရုပ်ရှင်လောက၊ အထူးသဖြင့် ဖိလစ်ပိုင်ဟော်ရာရုပ်ရှင်တွေမှာ အတွေ့ရခဲတဲ့ Anthology ဇာတ်ကားတစ်ကားဖြစ်ပြီး နာမည်ကျော်လူငယ် ဒါရိုက်တာသုံးယောက်က မတူညီတဲ့ဇာတ်လမ်းငယ်သုံးပုဒ်ကို ကိုယ့်ပုံစံနဲ့ကိုယ် လက်စွမ်းပြထားတာကိုတွေ့ရပါလိမ့်မယ်။Pocong ဆိုတဲ့အပိုင်းကို Yam Laranas ကရိုက်ကူးထားပြီး ဖိလစ်ပိုင်ရုပ်ရှင်လောကမှာတင်မကပဲ ဟောလိဝုဒ်အထိပေါက်ရောက်တဲ့သူတစ်ယောက်ပါ။ ဒီအပိုင်းမှာတော့သင်္ဘောသားတွေရဲ့ဘ၀အမောနောက်ခံကို အင်ဒိုနီးရှားနဲ့ မလေးရှားဇာတ်ကားတွေမှာတွေ့မြင်နေကြဖြစ်တဲ့ Pocong ဆိုတဲ့ ပိတ်ဖြူပတ်သရဲက ဖိစီးနှိပ်စက်ပုံကိုရှုစားကြရမှာပါ။ဒုတိယ အပိုင်းဖြစ်တဲ့ Berbalang ကိုတော့ Arthouse Horror တွေ နဲ့ World-building အပိုင်းမှာ ဆရာတစ်ဆူဖြစ်တဲ့Dodo Dayao ကရိုက်ကူးထားပြီးဒီဇာတ်ကားမှာအကောင်းဆုံးအပိုင်းဖြစ်သလို လူကြိုက်အများဆုံးအပိုင်းလည်းဖြစ်ပါတယ်။ ဘာဘာလန်း ဆိုတာ ဖိလစ်ပိုင်ဒေသခံရိုးရာ ရာဇဝင်တွေထဲက လူသားစား မိစ္ဆာတစ်ကောင်ဖြစ်ပြီးသူ့အကြောင်းကိုအခြေခံထားတာပါ။တတိယနဲ့နောက်ဆုံးအပိုင်းဖြစ်တဲ့ Sanib ကို ရိုက်ကူးသူကတော့ GMA ရုပ်သံလိုင်းရဲ့ နာမည်ကျော်ဒရာမာတွေဖန်တီးရှင် King Mark Baco ဖြစ်ပြီး Reality ရှိုးတွေမှာလည်းနာမည်ကြီးပါတယ်။ Sanib ကတော့ မိခင်နဲ့ပတ်သက်ပြီး စိတ်ဒဏ်ရာရှိနေတဲ့မိန်းမငယ်တစ်ယောက်ကို ဝင်ပူးတဲ့ နတ်ဆိုးအုပ်စုကို နှင်ကြရမယ့် ဖာသာတွေအကြောင်းကိုမြင်တွေ့ရမယ့်အပနှင်အပိုင်းပါ။ဇာတ်လမ်းတစ်ပုဒ်ချင်းစီက သူ့အထာနဲ့သူ ဆွဲဆောင်မှုရှိပြီးသေသပ်သလို အထူးပြုလုပ်ချက်တွေ၊ တင်ပြပုံတွေကပါအဆင့်မြင့်ပါတယ်။ သတင်းထောက်ဂျက်ဆီကာဆိုဟိုရဲ့နှစ်စဉ်ဟော်လိုဝင်းအထူးအစီအစဉ် သက်တမ်း နှစ် ၂၀ ပြည့် ပေးပို့လာကြတဲ့ ဖြစ်ရပ်မှန်ဇာတ်လမ်းတိုတွေကိုအခြေခံထားတာဖြစ်လို့ ဒီဇာတ်လမ်းတွေဟာလည်းဟော်ရာပရိသတ်တွေ လက်မလွှတ်သင့်တဲ့ ဖြစ်ရပ်မှန် ဇာတ်လမ်းတွေလို့ပြောလို့ရပါတယ်။