အာမီရာ သူ ကျောင်းသူဘ၀ကတည်းက လေးစားအားကျခဲ့ရတဲ့ ဘာသာရေးဆရာ ဖူရ်ကွန်နဲ့အိမ်ထောင်ပြုလိုက်ရတဲ့အခါအရမ်းကိုဝမ်းသာ ပီတိဖြစ်ခဲ့ရပါတယ်။ ဒါပေမယ့် မင်္ဂလာဦးညကစပြီးညပေါင်းများစွာလွန်မြောက်လာတဲ့အထိ ဖူရ်ကွန်ကသူ့ကိုလက်ဖျားနဲ့တောင် ထိမလာချိန်မှတော့ သူ့အပေါ်ထားတဲ့ သူ့ခင်ပွန်းရဲ့စိတ်သဘောထားကို သံသယတွေဝင်ရင်းသူ့ရဲ့ ပျော်ရွှင်မှုတွေတစ်ဖြည်းဖြည်း မှေးမှိန်လာပါတော့တယ်။ ဒါပေမယ့်လည်း အဲ့ဒီအချက်ကလွဲလို့ ဖူရ်ကွန်ရဲ့မိသားစုကလည်းသူ့ကို သမီးရင်းနဲ့မခြားချစ်ခင်သလို ဖူရ်ကွန်ကိုယ်တိုင်ကလည်း တစ်ခြားခင်ပွန်းတာဝန်တွေကျေပွန်နေပြန်ပါတယ်။ဒီလိုနဲ့ အာမီရာတစ်ယောက် သူ့ခင်ပွန်း သူ့ကိုထိတွေ့လာစေဖို့နဲ့ ဘာကြောင့် အခုလိုဖြစ်နေရသလဲဆိုတဲ့ အဖြေကိုအသည်းအသန်ရှာဖွေရပါတော့တယ်။ ဇာတ်ကားက ချစ်ဖို့ကောင်းသလိုအစပိုင်းခန်းတွေမှာသဘာ၀ကျကျဟာသတွေနဲ့ရယ်နေရပါတယ်။ တကယ်တမ်းလေးနက်လာတဲ့အချိန်မှာလည်း ထင်မှတ်မထားတဲ့အချိုးအကွေ့တွေနဲ့အဆုံးထိ ဆွဲခေါ်သွားနိုင်တဲ့ဇာတ်ကားကောင်းတစ်ကားပါပဲ။