Lost Care HD

Lost Care

Crime Drama Mystery HD 2023-03-24 7.833 0 Min

ယာဂါဘိုးဘွားကူညီစောင့်ရှောက်ရေးစင်တာ (Yaga Care Center) မှာ အလုပ်လုပ်နေတဲ့ ရှီဘမူနဲနိုရီ (Shiba Munenori) က ဘိုးဘွားတွေကို အိမ်တိုင်ရာရောက် ကူညီစောင့်ရှောက်ပေးနေတဲ့သူ။ဘိုးဘွားတိုင်းအပေါ် သူ့မိဘလိုသဘောထားပြီး ကြင်ကြင်နာနာ နွေးနွေးထွေးထွေး ဆက်ဆံပေးနေလို့ တစ်စင်တာလုံးက လေးစားအားကျနေရတဲ့သူ။ တစ်နေ့ သူတို့စင်တာက ကူညီစောင့်ရှောက်ပေးနေရတဲ့အုမဲဒါကန်တာရို (Umeda Kantaro) ဆိုတဲ့ အဘိုးတစ်ယောက်ရဲ့အိမ်မှာ စင်တာမှူးဖြစ်တဲ့ ဒန်မိုတိုဟာရု (Dan Motoharu) ကို သေဆုံးလျက်သား ရှာတွေ့ခဲ့တဲ့အပြင် အုမဲဒါကန်တာရိုလည်းသေဆုံးနေပါတယ်။ သူတို့သေဆုံးမှုက လူသတ်မှုလား မတော်တဆသေဆုံးမှုလား ဆိုတာ သိရှိရဖို့ ရှေ့နေမလေး အိုတိုမို (Otomo) က လိုက်စုံစမ်းစစ်ဆေးတော့ ကြင်နာစိတ်အပြည့် စေတနာအပြည့်နဲ့ဘိုးဘွားတွေကို ကူညီစောင့်ရှောက်ပေးနေတဲ့ ရှီဘမူနဲနိုရီက သံသယအရှိဆုံးလူဖြစ်နေကြောင်း သိသွားရတဲ့အခါ…၂၀၁၃ ခုနှစ်မှာ ရေးသားထုတ်ဝေခဲ့တဲ့ Aki Hamanaka ရဲ့ Lost Care ကို ဒီနှစ်အတွင်းမှာဒါရိုက်တာ Tetsu Maeda က ဒီနာမည်နဲ့ပဲ ရိုက်ကူးထုတ်ဝေခဲ့ပါတယ်။ L မင်းသားကြီး Kenichi Matsuyama က ဘိုးဘွားတွေကိုပြုစုစောင့်ရှောက်ရတဲ့ ကြင်နာစိတ်အပြည့်ရှိအကူဝန်ထမ်းအဖြစ်သရုပ်ဆောင်ပြီး Kingdom Live Action Movies တွေမှာ တောင်တန်းဘုရင်မ Youtanwa အဖြစ် သရုပ်ဆောင်တဲ့ Masami Nagasawa က ဒီကားထဲမှာတော့ရှေ့နေမလေးအနေနဲ့ အဓိကပါဝင်သရုပ်ဆောင်ထားပါတယ်။Lost Care ဇာတ်ကားမှာ သက်ကြီးရွယ်အိုတွေကို ပြုစုစောင့်ရှောက်ရတဲ့အလုပ် Kaigo -Caregiving- (ကိုင်းဂို့)၊ ပြုစုစောင့်ရှောက်ပေးရသူ(အကူ) Kaigoshi – Carer- (ကိုင်းဂို့ရှီ) စတဲ့စကားလုံးတွေကို ခဏခဏကြားနေရမှာဖြစ်ပြီး အဲဒီအလုပ်ရဲ့တာဝန်ကို တစ်စိတ်တစ်ပိုင်း မြင်ရမှာဖြစ်သလို အဲဒီအလုပ်ကိုလုပ်နေသူတွေရဲ့ခံစားချက်ကိုလည်း သရုပ်ဆောင်တွေရဲ့ ဒိုင်ယာလော့ကနေသိရှိရမှာပါ။ဒီဇာတ်ကားကိုကြည့်ပြီးရင် ကိုယ့်ပတ်ဝန်းကျင်အနားက ပြုစုစောင့်ရှောက်ခံရဖို့ လိုအပ်နေကြတဲ့ သက်ကြီးရွယ်အိုတွေ၊ သက်ဆိုင်ရာမိသားစုဝင်တွေက ပြုစုစောင့်ရှောက်ပေးနေတဲ့သက်ကြီးရွယ်အိုတွေကို သွားမြင်ယောင်ကြမှာဖြစ်ပြီး ရှီဘမူနဲနိုရီရဲ့ခံစားချက်တွေနဲ့ လုပ်ရပ်တွေကို နားလည်သဘောတူသလို ဖြစ်လာနိုင်ပေမဲ့ အဲဒါတွေဟာ လူသားစံနှုန်းအရရော ဥပဒေအရရောခွင့်ပြုမထားတဲ့အရာတွေသာဖြစ်ပါတယ်။