ဒရူးဖာရန်ဆိုတဲ့ ကောင်လေးဟာ မိဘနှစ်ပါးရယ် အစ်ကိုဖြစ်သူရယ်နဲ့ ဘဝကိုအေးအေးချမ်းချမ်း နေထိုင်နေတဲ့ လူငယ်လေးတစ်ဦးပါ။တစ်နေ့တော့ အချိန်အတော်ကြာမှ မြင်တွေရတဲ့ မုဆိုးလဟာ ကောင်းကင်မှာ ထွက်ပေါ်လာခဲ့ပါတယ်။ဒီမုဆိုးလနဲ့အတူ ဒရူးရဲ့ ခန္ဓာကိုယ်ဟာလည်း ပြောင်းလဲမှုတွေစတင် ဖြစ်ပေါ်လာပြီးမျက်လုံးတွေကပါ အရောင်တွေ တောက်ပလာခဲ့ပါတယ်။ဒီလိုအချိန်မှာ ဘယ်ကမှန်းမသိတဲ့ သတ္တဝါတစ်ကောင် ရောက်လာပြီးဒရူးကို ဖမ်းခေါ်သွားဖို့ ကြိုးစားတော့ မိခင်ဖြစ်သူက တားဆီးခဲ့ပါတယ်။အထိန်းအချုပ်တွေ မဲ့ကုန်ပြီး ဒရူးရဲ့ မိခင်ဖြစ်သူဟာ ဒရူးသိသင့်တာတွေကို ပြောမပြနိုင်ခင်မှာပဲ ဆုံးပါးသွားခဲ့ပါတယ်။ဒရူးရဲ့ အဖေနဲ့အစ်ကို အပါအဝင် ရွာသားတွေကလည်း မိခင်ကို သတ်တဲ့သူဆိုပြီး ဒရူးကိုလိုက်လံဖမ်းဆီးကြလို့ ဒရူးဟာ ထွက်ပြေးရင်း မိခင်ဖြစ်သူမှာခဲ့တဲ့ “ဘရက်ကန်ဟုမ်းက နယ်စားဘာဂန်ကို ရှာပါ” ဆိုတဲ့ စကားအတိုင်း သူ့ရဲ့ အမှန်တရားကို ရှာဖွေဖို့ ခရီးဆက်ခဲ့ပါတော့တယ်။