ဖေဖော်ဝါရီလ ၁၀ ရက်နေ့ကမှ Netflix မှာ စတင်ပြသခဲ့တဲ့ အီတလီစီးရီးသစ် "Motorvalley" ဟာ ပြိုင်ကား ဝါသနာရှင်တွေနဲ့ ဒရာမာ ကြိုက်သူတွေအတွက် စိတ်ဝင်စားစရာ ရွေးချယ်မှုတစ်ခုဖြစ်ပါတယ်။ "Fast & Furious" ရဲ့ အက်ရှင်အငွေ့အသက်တွေနဲ့ "Drive to Survive" ရဲ့ ပြိုင်ပွဲ စိတ်လှုပ်ရှားစရာတွေကို အီတလီ မိသားစုဒရာမာ ဇာတ်လမ်းဆင်ထားတဲ့ ပုံစံမျိုးပါ။ဇာတ်လမ်းကတော့ ဂုဏ်သိက္ခာကြီးမားတဲ့ Dionisi မိသားစုရဲ့ ပြိုင်ကားအသင်းကနေ စတင်ပါတယ်။ အသင်းပိုင်ရှင်ရဲ့ သမီးဖြစ်သူ Elena Dionisi ဟာ အရှုပ်တော်ပုံတစ်ခုကြောင့်မိသားစုစီးပွားရေးမှာ နေရာပျောက်ဆုံးခဲ့ရပါတယ်။ သူမရဲ့ အစ်ကိုဖြစ်သူက လုပ်ငန်းကို လွှဲပြောင်းယူလိုက်ပြီး အသင်းကို စီးပွားရေးဆန်ဆန် ပြောင်းလဲပစ်လိုက်တဲ့အခါမှာတော့ Elenaမနေနိုင်တော့ပါဘူး။သူမရဲ့ မိသားစု အမွေအနှစ်ကို ပြန်လည်ရယူဖို့အတွက် Elena ဟာ စွန့်စားခန်းတစ်ခုကို စတင်ပါတယ်။ သူမဟာ အတိတ်က အမှားတွေကြောင့် နာမည်ပျက်နေတဲ့ ဝါရင့်ချန်ပီယံဟောင်း Arturo(Luca Argentero) နဲ့ အရည်အချင်းရှိပေမယ့် စည်းကမ်းမရှိတဲ့ လူငယ်ယာဉ်မောင်း Blu (Caterina Forza) တို့ကို ခေါ်ယူပြီး အသင်းသစ်တစ်ခု ဖွဲ့စည်းပါတယ်။ သူတို့သုံးဦးသား ပူးပေါင်းပြီးအီတလီ GT Championship မှာ ဝင်ရောက်ယှဉ်ပြိုင်ရင်း အခက်အခဲတွေကို ဘယ်လို ကျော်ဖြတ်ကြမလဲ ဆိုတာကို ရင်ခုန်စရာ ကြည့်ရှုရမှာပါ။