HBO က ထုတ်လွှင့်လာတဲ့ ပြင်သစ်စကားပြော Thriller စီးရီးတစ်ခု တင်ဆက်ပေးချင်ပါတယ်။ အဒဲလ်ဆိုတဲ့ ကောင်မလေးက အသက်ငယ်ငယ်မှာ လူသ-တ်ရန် ကြံစည်မှုနဲ့ ထောင်ကျနေပြီး ခံဝန်နဲ့ လွတ်မြောက်ဖို့ရာ သူမကို အာမခံပေးနိုင်မယ့် အလုပ်တစ်ခုကို လိုအပ်လာပါတယ်။ ဒီလိုနဲ့အကျဉ်းထောင်ကနေပဲ စီစဉ်ပေးတဲ့ ဟိုတယ်အကြီးစားတစ်ခုမှာ အထုတ်သယ်ပေးရတဲ့ ဝန်ထမ်းလုပ်ဖို့ အကြောင်းဖန်လာပါတော့တယ်။ ဟိုတယ်က ပါရီမြို့ရဲ့ အခမ်းနားဆုံး ဇိမ်ခံဟိုတယ်တွေထဲက တစ်ခုဖြစ်ပြီး အထက်တန်းလွှာမိသားစုတွေနဲ့ နာမည်ကျော်တွေပဲ လာရောက်တည်းခိုတဲ့ နေရာပါ။ ပထမဆုံးနေ့မှာတင်ပြဿနာဖြစ်ပြီး အလုပ်ပြုတ်တော့မလို ဖြစ်တဲ့အချိန် အထွေထွေမန်နေဂျာ အေဒွာဂယ်ဇန်းရဲ့ အခက်အခဲတစ်ခုကို သူကူညီပေးလိုက်နိုင်တယ်။ စေတနာနဲ့ကူတာတော့ မဟုတ်ဘူးပေါ့။ သူ့ဘက်ကလည်း အလုပ်မပြုတ်အောင်၊ ဒီအလုပ်ရဲ့ အာမခံပေးမှုနဲ့ ခံဝန်နဲ့လွတ်မြောက်အောင် လုပ်ပေးတာပေါ့။ အဲဒီမှာ အထွေထွေမန်နေဂျာက သူမကိုအထုတ်သယ်ဝန်ထမ်းနေရာကနေ ဧည့်ကြိုဌာနကို ပြောင်းပေးလိုက်တယ်။ တကယ်တော့ အထွေထွေမန်နေဂျာက သူ့လိုမျိုး ပြစ်မှုကျူးလွန်ထားပြီး ရောက်ရောက်လာတဲ့ ကလေးတွေကို လက်သပ်မွေးပြီး မဟုတ်တာတွေ ခိုင်း၊ ပြဿနာတက်ပြီဟေ့ဆိုပြစ်မှုမှတ်တမ်းရှိပြီးသား ကလေးကိုပဲ ထိုးချတတ်တဲ့လူစားမျိုး။ ဒီဇာတ်လမ်းမှာ လူကောင်းရယ်လို့ တစ်ယောက်မှတော့ မပါဘူး။ ရရင်ရသလို ကတုံးပေါ် ထိပ်ကွက် လုပ်သွားကြတဲ့လူတွေချည်းပဲ။ အဒဲလ် တစ်ယောက် အဲဒီလိုလောကကြီးထဲမှာ ဘယ်လိုမျိုးစိန်ခေါ်မှုတွေကို ရင်ဆိုင်ရမလဲ။