ဒီဇာတ်လမ်းတွဲကတော့ တရားဥပဒေ စိုးမိုးရေးနယ်ပယ်မှာ နေရာအသီးသီးကနေ တာဝန်ထမ်းဆောင်နေကြတဲ့ Hollingsworth မိသားစုအကြောင်းကို ရိုက်ကူးတင်ဆက်ထားတဲ့ အက်ရှင်မှုခင်း သည်းထိတ်ရင်ဖို စီးရီးသစ်ပဲ ဖြစ်ပါတယ်။ ဖခင်ဖြစ်သူ Mike က အငြိမ်းစားယူခါနီး Secret Service အရာရှိ၊ မိခင်ဖြစ်သူ Jane က U.S. Marshal၊ သမီးဖြစ်သူ Clare က FBIအေးဂျင့်ဖြစ်ပြီး သားဖြစ်သူ Russell ကလည်း တရားရေးဌာန (DOJ) မှာ အလုပ်ဝင်ခါစ လူငယ်တစ်ယောက် ဖြစ်ပါတယ်။ဇာတ်လမ်းကတော့ U.S. Marshal တစ်ယောက်ဖြစ်တဲ့ Libby လုပ်ကြံခံရပြီး သေဆုံးသွားရာကနေ စတင်ပါတယ်။ အစပိုင်းမှာတော့ တရားခံပြေး တစ်ယောက်နဲ့ အပြန်အလှန် ပစ်ခတ်ရင်းသေဆုံးသွားတယ်လို့ ထင်ရပေမဲ့ သမီးဖြစ်သူ FBI အေးဂျင့် Clare က နောက်ကွယ်က တတိယလူ (လူသတ်သမား) တစ်ယောက် ရှိနေတယ်ဆိုတာကို စုံစမ်းသိရှိသွားပါတယ်။သိပ်မကြာခင်မှာပဲ DEA, ATF နဲ့ U.S. Marshal စတဲ့ အစိုးရ အေဂျင်စီတွေက အရာရှိကြီးတွေ ဆက်တိုက် လုပ်ကြံခံလာရပါတယ်။ အဲဒီ လူသတ်သမားရဲ့ နောက်ထပ် ပစ်မှတ်ဟာHollingsworth မိသားစုထဲက တစ်ယောက်ယောက် ဖြစ်နေပြီး မသက်ဆိုင်တဲ့ Clare ရဲ့ ချစ်သူကောင်လေး Logan ပါ ကြားညပ်ပြီး အတိုက်ခိုက်ခံလိုက်ရပါတယ်။အဲဒီအခါမှာ မိသားစုတွင်း ပြဿနာတွေ၊ ဖုံးကွယ်ထားတဲ့ လျှို့ဝှက်ချက်တွေ ရှိနေတဲ့ Hollingsworth မိသားစုဝင်တွေဟာ အချင်းချင်း ကာကွယ်ဖို့အတွက် မိသားစုအရေးတွေရော၊ ကိုယ်ပိုင်အလုပ်တာဝန်တွေကိုရော ဘယ်လို ဟန်ချက်ညီညီ ပေါင်းစပ် ဖြေရှင်းမလဲ ဆိုတာကို ရင်ခုန်စိတ်လှုပ်ရှားဖွယ် ကြည့်ရှုရမှာပါ။ အစိုးရ အေဂျင်စီတွေကြားက အားပြိုင်တာတွေ၊ စုံစမ်းစစ်ဆေးရေးလုပ်ငန်းစဉ်တွေနဲ့ မိသားစု ဒရာမာ ဇာတ်ကွက်တွေကို အချိုးကျကျ တင်ဆက်ထားလို့ မှုခင်း စုံစမ်းရေးနဲ့ အက်ရှင် သည်းထိတ်ရင်ဖို စီးရီးကောင်းတွေကို နှစ်သက်တဲ့ ပရိသတ်တွေအကြိုက်တွေ့စေမယ့် ဇာတ်လမ်းတွဲသစ် တစ်ခုပဲ ဖြစ်ပါတယ်။