"နှင်းတောင်တန်းတွေကြားက သွေးစွန်းနေတဲ့ ဓားသွားတွေ၊ မျိုးဆက်လေးဆက်တိုင်တိုင် မပြေလည်နိုင်ခဲ့တဲ့ ရန်ငြိုးတွေနဲ့ သိုင်းလောကရဲ့ ဂန္ထဝင်ဇာတ်လမ်းတစ်ပုဒ်..." တရုတ်သိုင်းဝတ္ထုတွေရဲ့ ဖခင်ကြီးလို့ တင်စားရတဲ့ စာရေးဆရာကြီး ကျင်းယုံ (Jin Yong) ရဲ့ နာမည်ကျော် ဂန္ထဝင်ဝတ္ထုကို အသက်သွင်းရိုက်ကူးထားတဲ့ ၂၀၀၆ ခုနှစ်ထွက် "Fox Volant of the Snowy Mountain" (နှင်းတောင်သူရဲကောင်း) ဇာတ်လမ်းတွဲနဲ့ မိတ်ဆက်ပေးပါရစေ။ ဒီကားဟာ ဝူရှ သိုင်းကားပရိသတ်တွေကြားမှာ အခုချိန်ထိ ရေပန်းစားနေဆဲ Masterpiece တစ်ခုဖြစ်ပြီး၊ မင်းသား Nie Yuan နဲ့အတူ နာမည်ကြီး မင်းသမီးတွေဖြစ်တဲ့ Athena Chu ၊ Gillian Chung နဲ့ Ady An တို့က အဓိက ပါဝင်သရုပ်ဆောင်ထားပါတယ်။ ဒါ့အပြင် ဝါရင့်သရုပ်ဆောင်ကြီးတွေဖြစ်တဲ့ Anthony Wong နဲ့ Alex Fong တို့ကလည်း ဇာတ်လမ်းကို ပိုမိုခမ်းနားသွားအောင် အားဖြည့်ပေးထားပါတယ်။ ဇာတ်လမ်းအစမှာတော့ မင်မင်းဆက် ပြုတ်ကျချိန်ကစလို့ ဟူ၊ မြောင်၊ ဖန်၊ ထျန်း ဆိုတဲ့ မိသားစုလေးစုကြားမှာ မျိုးဆက်ချီပြီး ဖြစ်ပွားခဲ့တဲ့ သွေးထွက်သံယို ရန်ငြိုးတွေကနေ အစပြုထားပါတယ်။ ဒီရန်ငြိုးတွေရဲ့ အထွတ်အထိပ်အဖြစ် သိုင်းလောကရဲ့ ပြိုင်ဘက်ကင်း သူရဲကောင်းနှစ်ဦးဖြစ်တဲ့ ဟူယီတောင်း (Hu Yidao) နဲ့ မြောင်ရန်ဖုန့် (Miao Renfeng) တို့ရဲ့ နှင်းတောင်ပေါ်က သမိုင်းဝင် သိုင်းပြိုင်ပွဲကြီး ဖြစ်ပွားခဲ့ပါတယ်။ ဒါပေမဲ့ မသမာသူတွေရဲ့ လုပ်ကြံမှုကြောင့် ဟူယိတောင်း သေဆုံးသွားခဲ့ပြီး သူ့ရဲ့ ဇနီးဖြစ်သူပါ အသက်စွန့်သွားခဲ့ပါတယ်။ သူတို့ရဲ့ တစ်ဦးတည်းသော သားလေး ဟူဖေ (Hu Fei) ဟာ မိဘမဲ့ဘဝနဲ့ ကြီးပြင်းလာခဲ့ပြီးနောက်မှာတော့ ဖခင်ဖြစ်သူရဲ့ သိုင်းကျမ်းကို လေ့ကျင့်ကာ သိုင်းလောကမှာ "နှင်းတောင်ပေါ်က မြေခွေးပျံ" ဆိုတဲ့ နာမည်နဲ့ ကျော်ကြားလာပါတော့တယ်။ မိဘတွေရဲ့ သေဆုံးမှုနောက်ကွယ်က အမှန်တရားကို ရှာဖွေရင်း၊ ဖခင်ရဲ့ ပြိုင်ဘက်ဖြစ်ခဲ့တဲ့ မြောင်ရန်ဖုန်းကို ကလဲ့စားချေဖို့ ကြိုးစားတဲ့အခါမှာတော့... သိုင်းလောကရဲ့ ရှုပ်ထွေးလှတဲ့ နိုင်ငံရေး လှည့်ကွက်တွေ၊ သစ္စာဖောက်မှုတွေကြားထဲကို ကျရောက်သွားပါတော့တယ်။ ဒီခရီးစဉ်မှာ ဟူဖေတစ်ယောက် ဉာဏ်ပညာထက်မြက်တဲ့ ယွမ်ကျစ်ယီ၊ ဆေးပညာကျွမ်းကျင်ပြီး အနစ်နာခံတတ်တဲ့ ချန်လင်းစု၊ ရန်သူ့သမီးဖြစ်နေပေမဲ့ ဖြူစင်တဲ့ မြောင်ရော့လန် ဆိုတဲ့ မိန်းကလေးသုံးယောက်နဲ့ ဆုံတွေ့တဲ့အခါမှာတော့ အချစ်၊ သံယောဇဉ်နဲ့ ရန်ငြိုးတွေကြားမှာ ဘယ်လို ရွေးချယ်မှုတွေ လုပ်သွားမလဲဆိုတာကို ကြည့်ရှုရမှာပါ။ ဒီဇာတ်ကားရဲ့ အကြီးမားဆုံး အားသာချက်ကတော့ ကျင်းယုံရဲ့ ဝတ္ထုတွေထဲကအတိုင်း ဇာတ်ကောင်တွေရဲ့ စိတ်နေသဘောထား၊ လူ့သဘာဝနဲ့ သိုင်းလောကရဲ့ ရက်စက်မှုတွေကို ပီပီပြင်ပြင် ရိုက်ကူးပြနိုင်တာပါပဲ။ နှင်းတောင်တန်းတွေပေါ်က ခမ်းနားတဲ့ သိုင်းချအခန်းတွေ၊ ဇာတ်ကောင်တွေရဲ့ အချိတ်အဆက်မိတဲ့ သရုပ်ဆောင်ချက်တွေနဲ့ ကြေကွဲဖွယ်ရာ အချစ်ဇာတ်လမ်းတွေက ကြည့်ရှုသူကို အပိုင်းတိုင်းမှာ ဆွဲဆောင်ထားနိုင်မှာ အသေအချာပါပဲ။ ဂန္ထဝင် တရုတ်သိုင်းကားကောင်းတွေကို လွမ်းဆွတ်နေတဲ့ ပရိသတ်တွေအတွက် လုံးဝ အချိန်ပေးရကျိုးနပ်စေမယ့် ဇာတ်ကားကြီးဖြစ်ကြောင်း ညွှန်းဆိုလိုက်ရပါတယ်။